Monday, 5 February 2018

Daripada Mabuk Tuak, Enak Ngopi Ajo, Dak


"CACAAM... Dituja lagi, dituja lagi," kato Mang Bon geleng-geleng palak. Nyo lagi baco koran RPP yang judulnyo Pemuda Pahlawan Kena Tujah, sambil minum kopi itam di warung teh kocok Wak Utet di belakang Bang Mego.
"Bon, tengok dulu koran tu, aku ndak baco cerito penujahan tu nah. Orang-orang la bahas itu galo eh, aku belum tau," kecek Mang Yat agak mencangut. Mang Bon nyengir. 
"Kelak dulu, aku belum selesai. Kau pesan lontong dulu kek Wak Utet, kelak abis, orang tambah rami ko," kato Mang Bon idak berenti baco.
"Kelak la, aku ndak baco dulu," kato Mang Yat nunggu Mang Bon selesai.
Dak lamo tu, koran RPP la di tangan Mang Yat.
"Perasaan aku, sering nian kini orang dikit-dikit nuja, dikit-dikit nikam. Idak ado caro lain apo? Tapi bisa ajo la, iko pelakunyo lagi mabuk tuak," kato Mang Yat pas la suda baco koran RPP.
"Itula, Yat. Makonyo minuman yang memabukkan tu dilarang. Karno cak ikolah salah satu akibatnyo. Enta  belago, enta nuja orang, enta bawak motor mbasing, laju kecelakaan," kecek Mang Bon.
"Daripada mabuk tuak, enak ngopi ajo, dak," kato Mang Yat.
"Betuuul. Tapi jangan pulo kopi orang yang diminum. Kau tu pesan la, jangan minum yang aku," kucak Mang Bon. Mang Yat laju ncangut lagi kan. 
"Ado apo seh, Yat. Ncangut ajo masi pagi," Wak Utet la nimbrung pulo.
"Yat ndak mesan kopi itam, Wak," kato Mang Bon.
"La idak pulo pakai ncangut, seh. Kelak aku bikinkan," kecek Wak Utet. 
"Kek lontong yo, Wak," Mang Yat nyaut jugo, hihii.
"Abis," jawab Wak Utet
"Nasi uduk," kato Mang Yat
"La abis jugo," jawab Wak Utet
"Laaah, laju apo yang masi ado ko," kecek Mang Yat. Wak Utet tegelak, Mang Bon nyengir kudo.
"Tinggal pisang goreng sepiring, Yat," kato Wak Utet.
"Kan la aku kecek tadi, pesanla dulu lontong kek Wak Utet. Kau ndak mbaco berita dulu," kecek Mang Bon
"Iyola, eh. Kopi itam kek pisang goreng, Wak," kecek Mang Yat. Wak Utet kek Mang Bon nyengir. (**)  

  • Komentar via G+
  • Komentar via Facebook

0 komentar:

Item Reviewed: Daripada Mabuk Tuak, Enak Ngopi Ajo, Dak Rating: 5 Reviewed By: Radar Pat Petulai