Tuesday, 25 July 2017

Tim yang Kerjonyo Cak Detektip Tu Na

TEH KOCOK RPP
"ADO apo lagi, seh?" kecek Wak Utet sambil mbaco berita Banyak Masalah, Sekkab Panggil Direktur RSUD, di koran RPP.
Dak lamo tu, Wak Utet ngangguk-ngangguk.
Mang Bon kek Mang Yat yang baru sampai di warung teh kocok Wak Utet di belakang Bang Mego, laju bingung negok Wak Utet.
"Ngapo pagi-pagi la ngangguk-ngangguk tu, Wak?" tanyo Mang Bon, sambil narik kursi, laju duduk dekek Wak Utet. Mang Yat duduk jugo.
"Gara-gara banyak masala," kato Wak Utet masi pokus kek koran RPP.
"Cacaaam, Wak. Jangan pulo gara-gara banyak masala laju galak ngangguk-ngangguk sorang," kecek Mang Bon.
"Bukaaan.. Maksud aku, berita ko na, ruma sakit banyak masala," kato Wak Utet.
"Ooo..." Mang Bon kek Mang Yat njawab serempak sambil nyengir-nyengir.
"Ruponyo bukan penyakit ajo yang banyak di ruma sakit. Masala jugo banyak dak," kecek Mang Bon.
"Iyo pulo dak. Banyak penyakit, banyak masala, banyak pulo dedemit jangan-jangan," kato Mang Yat.
"Husss.. Pagi-pagi la nyebut-nyebut dedemit. Datang nian nyo kelak, Yat," kecek Mang Bon.
"Ai eh, maso pulo sampai datang," kato Mang Yat. Mang Bon tekikik nengok muko Mang Yat langsung merengut. Takut sebenarnyo tu.
"Apo ceritonyo Wak, sampai banyak masala cak itu," tanyo Mang Bon.
"Itu na, kan perna masuk koran RPP jugo, yang ado WC pakai bayar, WC banyak rusak. Laju tu oknum yang bemasala kek pasien, yang pegang-pegang tu na, seh, maso kamu orang idak tau," kecek Wak Utet.
"Tau, Waaaak..." jawab Mang Bon kek Mang Yat serempak lagi. Wak Utet tekikik.
"Tapi yo, kalu nurut aku, jangan cuman dipanggil ajo direktur nyo ko. Harus ado nian tim yang ngecek benar apo idak. Bukan idak pecayo. Tapi aku raso lebih padek kalu ado tim nian turun. Tim yang kerjonyo cak detektip tu na," kecek Wak Utet.
"Setuju aku, Wak. Tim tu harus dibentuk, laju turun nian, biar dak ado yang ditutup-tutupi," kato Mang Bon.
"Tapi Wak dak usa masuk dalam tim tu yo. Biar piak bewenang ajo," pesan Mang Yat. Mang Bon tekikik. Wak Utet laju tekikik pulo. Dalam atinyo, tau nian Mang Yat apo yang ado di pikirannyo, ndak jadi detektip tu na, seh. (**)
  • Komentar via G+
  • Komentar via Facebook

0 komentar:

Item Reviewed: Tim yang Kerjonyo Cak Detektip Tu Na Rating: 5 Reviewed By: Radar Pat Petulai