Friday, 7 July 2017

Siapo Kamu, Main Mintak Ajo

TEH KOCOK RPP
WAK Utet baru selesai beberes di warung teh kocoknyo di belakang Bang Mego. Sambil nunggu pelanggan, Wak Utet nyantai sambil baco koran RPP. Karno tadi sempat nengok sekilas, judul berita Oknum Wartawan dan LSM Kena OTT, Wak Utet penasaran, laju langsung baco berita itula.
"Oii, lemak nian kamu beduo ko! Mintak-mintak ajo cak idak beduso!!" Wak Utet emosi jiwa raga.
Nah, Mang Bon kek Mang Yat yang baru sampai, laju tekejut.
"Ngapo kami beduo ko, Wak? Kami baru nian sampai di warung Wak," kecek Mang Bon. Mang Yat langsung duduk di kursi dekek Wak Utet sambil nunjukkan koran RPP kek Mang Bon.
"La bukan kamu beduo, seh. Iko na, kecek aku tu. Oknum wartawan kek oknum anggota LSM ko, na," kato Wak Utet sambil nyuruh Mang Bon baco beritanyo. Tapi Mang Yat la ngambik koran RPP duluan. Mang Bon tepakso nunggu dulu.
Dak lamo tu..
"La, kenai operasi tangkok tangan jugo. Pakai mintak ke ruma sakit pulo," kecek Mang Yat.
"Iyo, kurang kerjo tobo duo tu. Maso pulo mintak duit ke ruma sakit, dari seratus ribu mintak lagi dikasi duo juta, laaah, mintak lagi duo pulu juta. DUO PULU JUTA!" kato Wak Utet nekankan nian jumla yang dimintak tu.
"Kan IDAK TAU DIRI!!" ruponyo masi belanjut Wak Utet.
"Aku yakin kalu orang cak iko mintak duit pakai makso kek Wak, nanggung dilantak sendok kayu," kato Mang Bon.
Wak Utet kek Mang Yat tekikik.
"Iyola pulo, seh. Siapo kamu, main mintak ajo. Kito tumbang ambur nyari duit mangko badan rengko, la ado yang idak tau diri, mintak-mintak ajo cak idak beduso," kecek Wak Utet.
"Kalu memang kemampuannyo tu mintak sambil meras dak, Wak. Kan itu jugo butu kemampuan," kato Mang Bon.
"Untung nian aku idak punyo kemampuan cak itu, Bon," Mang Yat nyaut.
"La jangan pulo, Yat. Laju kau yang masuk koran RPP kelak," kecek Wak Utet.
"Kalu cak itu, tolong nian bikinkan pesanan aku, Wak. La lapar. Aku selero nian makan nasi uduk pakai tahu goreng, Wak. Kek teh kocok jugo yo," pesan Mang Bon.
"Aku lontong kek kopi itam, Wak," Mang Yat dak ndak ketinggalan.
"Siap, siaaaap. Pesan ko beli yo, jangan main intak-mintak ajo," kucak Wak Utet.
"Siapo kamiiii.. Main mintak ajo," kecek Mang Bon kek Mang Yat, la kompak nian, hihihiii. Wak Utet laju tekikik. (**)
  • Komentar via G+
  • Komentar via Facebook

0 komentar:

Item Reviewed: Siapo Kamu, Main Mintak Ajo Rating: 5 Reviewed By: Radar Pat Petulai