Monday, 10 July 2017

Rencana Tuhan Lebi Padek

TEH KOCOK RPP
Akhirnyooo.. Raso-raso ikut tes, Mang Bon ikut lega jugo karno hasil tes TKS la diumumkan. Mang Bon kek Mang Yat lagi mbahas iko lah di warung teh kocok Wak Utet di belakang Bang Mego.
"Cak mano tetanggo-tetanggo kau, Bon? Lulus dak?" tanyo Wak Utet sambil ngantarkan tahu goreng pesanan Mang Bon.
"Alhamdulillah, lulus galo, Wak. Tobo ko kan la lamo nunggu. Jadi pas dapek kabar pengumuman, langsung pai nengok. Balik ke ruma, cera galo mukonyo," kecek Mang Bon.
"Syukurla kalu cak itu. Kan enak kalu la tau hasilnyo, idak digantung dak bejudul. Kiro-kiro aman dak yo pas pengumuman tu? Kalu-kalu ado pulo yang ngamuk karno ado ponaan, sanak, anak atau dulurnyo yang idak lulus," kecek Wak Utet.
"Dak tau jugo aku, Wak. Tapi ado aku dengar bisik-bisik, memang ado yang ribut. Nyo angek sanak-sanaknyo dak do yang lulus tes. Tapi enta benar enta idak, aku jugo dak tau. Namonyo jugo bisik-bisik, idak jelas nian, idak pasti nian," kato Mang Bon.
"Bisa jugo dak. Mungkin karno la ngarok nian, tapi idak sesuai harapan. Tapi yo, balik-balik kek nasib, rejeki, la diatur kek Tuhan galo. Yang penting kito la usaha, la doa. Nah, hasilnyo tinggal aturan Tuhan. Mungkin kalu idak lulus TKS, ado hikma yang lebi baik, kan. Meskipun mungkin belum kini dirasokan apo hikmanyo tu," kecek Wak Utet.
"Betul nian, Wak. Kadang awalnyo kito memang mara, apo kendak kito idak dapek. Tapi lamo-lamo, baru nyadar, ruponyo rencana Tuhan lebi padek," kato Mang Bon.
"Na, betul kau tu. Karno memang apo yang kito ndak, memang idak segalo dapek, Bon. Tapi yakin ajo, kalu di balik itu, Tuhan la ngatur sesuatu untuk kito. Cuman memang awalnyo kito idak kan tepikir," kecek Wak Utet.
"Makonyo kito sebagai manusio, harus sabar-sabar, banyak besyukur. Kalu idak tu, pasti la mara ajo bawaan," kato Mang Bon, kini la nyomot tahu tigo potong. Lapar, mang? Hihihii.
"Kalu mara terus, lokak dara tinggi, laju struk, Bon," kecek Wak utet. (**)
  • Komentar via G+
  • Komentar via Facebook

0 komentar:

Item Reviewed: Rencana Tuhan Lebi Padek Rating: 5 Reviewed By: Radar Pat Petulai