Tuesday, 4 July 2017

Lulus, Lulus, Idak, Idak, Jangan lulus yang Idak-Idak

TEH KOCOK RPP
MANG Bon pagi-pagi la makan nasi uduk di warung Wak Utet di belakang Bang Mego. Perut la kenyang, lanjut kopi itam segele kecik, sambil mbaco koran RPP. Cacaam sedaap...
"Kito tunggu nian, ditepati dak janji ko," Mang Bon begumam pas mbaco berita Pengumuman TKS, Minggu Ini.
"Ado sanak, pamili, dulur atau tetanggo kau yang ikut tes TKS, Bon?" tanyo Wak Utet, mbawakkan sepiring pisang goreng pulo, laju narik kursi, duduk kek Mang Bon.
"Nah, we, bonus pisang goreng pagi ko," lanjut Wak Utet. Mang Bon nyengir, rejeki dak ke mano kan broh? Hihihi..
"Ado tetanggo aku beberapo orang, Wak. Tobo tu ikut. Iko la ndak aku kasi tau inponyo kelak. Tapi karno dari waktu tu dijanji-janji terus tapi dak ditepati jugo, kini la male pulo tobo tu ngapiknyo. Ndak lulus syukur, idak sudem lah," kecek tobo tu karno la litak nunggu.
"Iyo pulo dak. La berapo kali janji. Ah, macam lagu ajo, kau yang berjanji, kau yang mengingkariiii," kato Wak Utet sambil bedendang kek nokok sendok kayu pelan-pelan ke meja. Mang Bon laju tekikik.
"Kau yang mulai, kau yang mengakhiriiii.." Mang Bon melanjutkan.
"Betul jugo, Wak. Pas nian lagu tu," kecek Mang Bon pulo.
"La iyo la pulo, Bon. Tobo ko butu kepastian cepek. Kalu lulus yo besyukur. Kalu idak lulus, mungkin tobo ko ndak berijo lokak yang lain. Karno waktu kan bejalan terus. Tolong nian lah, jangan digantung-gantung dak tentu judul," kato Wak Utet.
"Nah, benar lagi, Wak. Kalu kini ndak berijo, mungkin nyo kelak lulus. Laju buye pulo yang ijoan lain ko. Kalu cepek kan, cak kato Wak tadilah. Intinyo, tobo ko butu kepastian, Wak. Lulus, lulus, idak, idak, jangan lulus yang idak-idak.
Wak Utet ngangguk-ngangguk.
"Tetanggo aku tu lapang ati kalu memang dak lulus, mungkin memang belum nasibnyo jadi TKS. Yang penting dulu la usaha, soal hasil la diatur galo tu, Wak.
Wak Utet ngangguk-ngangguk lagi. Entah ngerti, entah idak. Ngerti, ngerti, idak, idak, jangan ngerti yang idak-idak, Wak. Hihihii.. (**)
  • Komentar via G+
  • Komentar via Facebook

0 komentar:

Item Reviewed: Lulus, Lulus, Idak, Idak, Jangan lulus yang Idak-Idak Rating: 5 Reviewed By: Radar Pat Petulai