Wednesday, 5 July 2017

Laju Idup, Raso-raso Ajo

TEH KOCOK RPP
PAGI-pagi, Mang Bon kek Mang Yat la makan lontong di warung teh kocok Wak Utet di belakang Bang Mego. Idak lupo, suda tu mbaco koran RPP biar idak ketinggalan inpormasi.
"Cacaam.. Belum dapek jugo tahanan yang kabur ko dak. Laju kepalo lapas ikut ngejar," kecek Mang Bon kek Mang Yat, sambil nunjukkan berita Kalapas Ikut Buru Tahanan Kabur.
"Itula, Bon. Ke mano kiro-kiro belarinyo. Kalu dapek, lokak namba lagi hukuman tu. Ado-ado ajo lah orang ko. Tanggung jawab kalu sala tu, dak usa pakai belari. Namba-namba masala, idup la saro, banyak masala," kecek Mang Yat.
"Apo nian pagi-pagi la ngomel tu, Yat? Aku ajo belum mulai ngomel," kato Wak Utet, langsung begabung ngobrol kek mandan-mandannyo.
"Tahanan kabur ko na, Wak. Cubo la da usa belari-lari, idak selesai masala tu. Kalu jugo bisa kabur, idup dak kan tenang. Betul dak, Wak?" kato Mang Yat.
Wak Utet kek Mang Bon ngangguk serempak.
"Betul nian, Yat. Kecek orang tu, tidur dak nyenyak, makan idak enak," kecek Wak Utet.
"Eh, itu bukannyo kalu orang lagi jatu cinta, Wak?" tanyo Mang Bon.
Mang Yat kek Wak Utet tekikik.
"Iyo jugo dak. Maso aku samokan buronan kek orang jatu cinta. Yo pokoknyo, idup dak tenang. Kalu ado orang nengok raso-raso yang nengok polisi, kalu ado orang belari-lari, raso-raso ngejar nyo. Laju idup, raso-raso ajo," kecek Wak Utet.
"Kalu itu baru pas, Wak. Perasaan tu, yang nengok pasti la polisi. Jangan-jangan pas dengar anak-anak main pistolan, raso pulo suaro tembaan polisi yang lagi ngejarnyo," kato Mang Bon.
"Kiro-kiro, lamo dak tahanan ko dapeknyo yo?" tanyo Wak Utet kek Mang Bon kek Mang Yat.
"Belum tau kito, Wak. Mintak-mintak cepek dapek," jawab Mang Yat.
"Kalu cak itu...." muko Wak Utet nampak bepikir serius nian.
"Dak usa Waaaak," kato Mang Bon kek Mang Yat serempak. La tau nian, pasti Wak Utet ndak ikut pulo ngejar tahanan ko. Wak Utet nyengir. (**)
  • Komentar via G+
  • Komentar via Facebook

0 komentar:

Item Reviewed: Laju Idup, Raso-raso Ajo Rating: 5 Reviewed By: Radar Pat Petulai