Friday, 30 June 2017

Sampai Nenek-Nenek Cuman Jadi Tukang Nunggu

TEH KOCOK RPP
BIARPUN masi suasana Lebaran, tapi Mang Bon la besiap kek kerjoannyo. Karno baru suda panen kopi, sambil nunggu ndak nggarap kebun lagi, kini Mang Bon ngojek ajo. Nah, sebelum ngojek, Mang Bon ke warung teh kocok Wak Utet dulu di belakang Bang Mego. Wak Utet jugo pasti la bukak, karno nyo ndak serempak nian kek koran RPP, kemarin terbit, kemaren jugo Wak Utet la mulai jualan lagi, hihihi.
"Benar kan tebak aku, Wak la jualan ari ko," kato Mang Bon sambil narik kursi, laju duduk.
Wak Utet yang lagi khusyuk mbaco koran RPP, langsung nole kek pelanggan pertamonyo ari ko.
"La iyo, Bon. Aku serempak kek koran RPP. Kalu koran RPP la terbit, berarti aku jugo la mulai jualan lagi. Nah, kau ndak makan apo pagi ko?" tanyo Wak Utet.
"Nasi uduk ajo kek teh kocok, Wak," kecek Mang Bon. Wak Utet langsung tegak, laju pai nyiapkan pesanan Mang Bon.
Dak lamo tu, pesanan sampai. Mang Bon masi mbaco koran RPP.
"Agak besabar kalu ado sanak, tetanggo, dulur, pamili kito yang ndak jadi CPNS, Wak. Iko nah, cak nyo masih berek nian kito ndak ngadokan tes CPNS tu," kato Mang Bon.
"Iyo, aku baco tadi tu, Bon. Belanjo pegawai masi tinggi," kecek Wak Utet, laju duduk pulo.
"Itula, pengeluaran untuk pegawai la terlalu banyak, Wak. Kalu namba lagi, belanjo jadi tambah besak dak. Iyo kalu anggaran daerah cukup, kalu idak? Laju idak pacak ngapo-ngapo lagi kito karno duit untuk belanjo pegawai galo," kato Mang Bon.
"Makonyo, anak-anak mudo kini ko, jangan selalu mikir ndak jadi PNS. Karno kalu ngarok jadi PNS ajo, enta kapan ado tesnyo. Kalu pun ado tes, apo njamin bakal lulus? Kan idak. Kalu cak itu terus, sampai nenek-nenek cuman jadi tukang nunggu. Nunggu jadi PNS," kecek Wak Utet sambil geleng palak, idak abis pikirnyo.
"Betul, Wak. Kan jadi apo ajo asal bagus, idak nyusakan orang, aku raso jugo bisa jadi pilihan. Bisa jadi pengusaha, petani, pedagang. Pokoknyo banyak. Yang penting halal, idak usa gengsi. Apolagi kalu pacak mbuka lapangan kerjo, kan bantu pemerinta jugo ngurangkan angko pengangguran, Wak" kecek Mang Bon.
"Iyo nian, Bon. Tapi kalu kini, kebanyaan yo besakla gengsi. Kalu kerjo ndak langsung enak, ndak langsung jadi bos,  ndak langsung gaji besak. Mano pulo bisa, emangnyo perusahaan tu punyo neneknyo apo?" kato Wak Utet. (**) 
  • Komentar via G+
  • Komentar via Facebook

0 komentar:

Item Reviewed: Sampai Nenek-Nenek Cuman Jadi Tukang Nunggu Rating: 5 Reviewed By: Radar Pat Petulai