Friday, 7 April 2017

Kalu Belum Bisa, Jangan Makso

TEH KOCOK RPP
APO ceritonyo ko, ndak ujian sekolah pakai acara minjam laptop guru kek siswa? Mang Bon agak tekejut jugo pas mbaco berita di koran RPP, judulnyo Sekolah Pinjam Laptop Siswa. Akhirnyo, demi mbaco berita tu, makan lontong ditunda dulu dan lontong sepiring teletak elok di ate meja di warung teh kocok Wak Utet di belakang Bang Mego, hihihi.
Dak lamo, Mang Yat muncul. Bukannyo duduk kek Mang Bon, mala langsung ke dapur nemui Wak Utet, ndak mesan nasi uduk kek teh kocok. Lapar bukan main nian agaknyo. Suda tu, baru Mang Yat pai duduk kek Mang Bon.
"Apo berita tu, Bon? Serius nian kau mbaco. Lontong kau ko mane kelak, idak diapik," kato Mang Yat.
Mang Bon idak begeming. Tapi dak lamo tu, nyo la suda mbaco berita, langsung dilipeknyo koran, lanjut makan lontong. Mang Yat langsung ngambik koran RPP, mbaco pulo sambil nunggu pesanan sampai ke meja.
"Nah, iko la yang kadang bikin orang tuo dak abis pikir. Kau bayangkan, Bon, ndak ujian, tapi anak kito yang idak punyo laptop bingung ndak minjam ke mano. Biarpun sekola ngusahakan minjam laptop kek murid lain, kek guru, tapi tetap ajo laju ganggu konsentrasi karno sibuk nyari laptop. Untung anak aku belum ujian," kecek Mang Yat, ruponyo tetarik mbaco berita yang samo kek Mang Bon.
"Itula, ngapo pulo cak itu. Kesian pulo anak-anak yang idak punyo laptop, Yat. Pasti ado raso kecik ati dak. Nah, ujung-ujungnyo, orang tuo cak kito ko meraso tebeban nian. Maksud aku tu, misalnyo sekola belum bisa ikut ujian yang pakai komputer, yo pakaila yang nulis-nulis ajo dulu. Kan yang penting cak mano hasil ujiannyo. Itu nurut aku, Yat. Mungkin kalu orang tuo yang beduit, idak keberatan karno nyo la bisa mbelikan anaknyo laptop," kato Mang Bon.
"Iyo nian, Bon. Kalu belum bisa, jangan makso. Tapi bukan pasra. Karno selanjutnyo harus diupayakan cak mano biar bisa ujian pakai komputer, tapi idak pakai minjam-minjam laptop. Kan ado prosesnyo," kecek Mang Yat.
"Cacaam.. Tumben kau cerdas pagi ko. Apo karno langsung mesan nasi uduk ke dapur?" kucak Mang Bon. Ruponyo nyimak pulo kerjo Mang Yat langsung ke dapur mesan nasi uduk, hihihi.
"Tapi ngapo pesanan aku belum nyampai-nyampai yo, Bon?" Mang Yat heran jugo.
"La, dak tau aku," kato Mang Bon laju tekikik-kikik. (**)
  • Komentar via G+
  • Komentar via Facebook

0 komentar:

Item Reviewed: Kalu Belum Bisa, Jangan Makso Rating: 5 Reviewed By: Radar Pat Petulai