Friday, 7 April 2017

Jangan Galak Buang Sampa Mbasing

TEH KOCOK RPP
ALHAMDULILLAH... Akhirnyo honor tobo ko cair jugo. Syukurla eh, kan la lamo nian ditunggu-tunggu. Mang Bon masi lanjut mbaco koran RPP di warung teh kocok Wak Utet di belakang Bang Mego. Biarpun nyo bukan "pasukan kuning", tapi nyo ikut riang pas tau honor ndak cair. Soalnyo Mang Bon tau rasonyo kalu hak tetahan tu cak mano nian.
"Cair, cair, caiiiir," kato Wak Utet sambil ngantarkan pesanan Mang Bon.
"Tau ajo Wak ko, kalu ado yang cair," jawab Mang Bon nyengir-nyengir.
"Iyolah, Bon. Aku la mbaco duluan berita tu. Aku jugo ikut riang. Kasian tobo ko la lamo nunggu honornyo dak. Apolagi banyak kebutuhan, banyak butuh duit," kato Wak Utet yang la duduk pulo kek Mang Bon.
"Pasti la, Wak. Lagian memang hak tobo ko kan. Nyo la kerjo, maso idak dibayar honornyo. Jangan cak itu. Tapi dak usah dimasalakan lagi karno iko la ndak cair. Mintak-mintak ke depannyo idak pakai telat-telat lagi dak," kecek Mang Bon.
"Mintaklah cak itu. Bukan mudah kerjo tobo ko. Sewilayah dibersikannyo, yang diurus sampa, ntah sampa plastik, sayur busuk, makanan basi, kerte, kaco. Waaai, pokoknyo banyak nian. Nganggkut sampa, mbuang ke TPA, mungut yang beserak. Patut dihargoi kerjo tobo ko. Kalu idak ado, idak kan bersi daera kito," kato Wak Utet.
"Setujuuu, Wak. Tapi kito jangan cuman ngandalkan pasukan kuning ajo. Karno jumla tobo ko jugo tebatas, Wak. Maksud aku, sebagai warga yang baik kito jugo wajib njago kebersian. Apolagi rumah kek lingkungan kito dewek. Sudah tu, pesankan kek anak-anak kito, jangan galak buang sampa mbasing biarpun cuman bungkus gulo-gulo," kecek Mang Bon.
"Iyo, lah. Aku jugo galak kesal kalu nengok orang bemobil tau-tau di tenga jalan mbuang sampah seasoi. Kadang kaleng minuman dilantaknyo di jalan tu. Padahal jalan la bersi disapu kek pasukan kuning. Kan idak menghargoi kerjo orang namonyo tu. Sudah tu, mbuang sampa di sungai, jangan la seh. Kelak banjir karno sungai penu sampa, baru nangis-nangis," kecek Wak Utet.
"Makonyo kito jugo harus nyadarkan orang lain, Wak. Mulai dari kito, orang ruma, anak-anak, kito biasokan buang sampa tu di tempeknyo," kato Mang Bon. (**)
  • Komentar via G+
  • Komentar via Facebook

0 komentar:

Item Reviewed: Jangan Galak Buang Sampa Mbasing Rating: 5 Reviewed By: Radar Pat Petulai