Tuesday, 4 April 2017

Antara Cayo, Antara Idak

TEH KOCOK RPP
JADI kini, benar dak seh kabar culik menculik yang sempat bikin mak mak sejagad raya ko ceme? Wak Utet yang lagi mbaco berita Penculikan Anak, Antara Hoax dan Fakta di koran RPP, laju bekerut-kerut keningnyo.
"Benar idak, benar idak, benar idak, benar...," Wak Utet sambil ngitung sendok, hihihi.
"Ai, seh.. Benar idak, benar idak.. " Wak Utet belanjut
"Ngisi soal ujian apo, Wak?" tanyo Mang Bon yang la sampai di warung teh kocok Wak Utet di belakang Bang Mego. Sambil tegelak-gelak pulo Mang Bon nengok Wak Utet.
"Ai dah, kan kacau itungannyo ko. Benar apo idak tadi tu. Duduk dulu, Bon. Jangan pesan apo-apo dulu, aku ndak ngitung sendok ko sambil mastikan benar dak culik menculik kini ko," kato Wak Utet serius nian we.  
Mang Bon sambil mbaco koran RPP. "Ooh, pasti berita iko," kecek Mang Bon dalam ati, sambil lanjut mbaco.
Tibo-tibo..
"Nah! Idak benar, idak benar!" kecek Wak Utet la suda ngitung sendoknyo. Mang Bon tekejut laju kan.
"Wak tu dak usa la pakai ngitung-ngitung sendok. Baco ajo beritanyo di koran RPP ko nah, lengkap, Wak. Jadi kabar penculikan ko, memang ado yang ngicu ajo, ado jugo yang kejadian nian. Intinyo, benar yang ado nian kejadiannyo. Kalu cuman nyebar-nyebarkan berita dak do bukti, baru ngicu namonyo tu," kecek Mang Bon.
"Iyo, ngerti aku, Bon. Tapi aku kadang-kadang tu masi ceme tu nah. Antara cayo, antara idak. Karno cak yang perna jugo diberitakan RPP, memang ado nian penculikan tu. Untungnyo, tukang culik tu gagal. Kalu berita yang itu cayo aku, karno wartawan RPP langsung nemui korban ke ruma nyo. Jadi idak dibuek-buek," kato Wak Utet. 
"Betul, Wak. Nah, yang idak usa kito ceme tu, kalu orang cuman ngecek katonyo, katonyo. Korbannyo idak tau siapo, kejadiannyo kapan, di mano, jugo dak jelas. Nah, itu la yang idak usa dicayo. Tapi intinyo lagi, ado atau idak culik menculik tu, kito harus samo-samo waspada. Anak-anak ndak dijago nian, jangan sampai diculik. Orang tuo idak buli lengah, Wak. Cak kecek Pak Wabup di berita ko, keselamatan dan masa depan anak merupakan tanggung jawab bersama. Mulai dari orang tua, guru dan juga lingkungan sekitar. Nah, ado atau idak penculikan tu, pengawasan kek anak-anak harus tetap ditingkatkan," kecek Mang Bon panjang lebar. 
"Iyo, dak. Pokoknyo harus waspada," kato Wak Utet. (**)
  • Komentar via G+
  • Komentar via Facebook

0 komentar:

Item Reviewed: Antara Cayo, Antara Idak Rating: 5 Reviewed By: Radar Pat Petulai