Monday, 13 February 2017

Samcodin oh Samcodin

TEH KOCOK RPP
APONYO seh.  Yang namonyo pelajar tu, kerjonyo belajar, sekolah. Bukannyo mabuk-mabuk cak iko. Apo ceritonyo lah? Ngapo ngomel-ngomel sorang tu, Mang? Ruponyo Mang Bon lagi baco berita di koran RPP, soal pelajar mabuk bebem tu nah.
“Aku ajo yang la setuo iko, belum perna mabuk-mabuk. Niat ajo idak. Mako pelajar senang mabuk bebem, berem, tembem, apo lah nyebutnyo tu,” rutuk Mang Bon dalam ati. Pisang goreng baru duo potong dimakan, lanjut ngirup kopi itam, sedap nian.
“Apo bebem, bebem, tembem tu, Bon?” kato Wak Utet, langsung ngambik koran RPP dari tangan Mang Bon, duduk, laju mbaco berita tu penu konsentrasi. Berani ngucak, sendok kayu sampai ke palak, hihihi. Makonyo Mang Bon idak berani, mendingan diam ajo dulu.
“Ooh.. la ganti gaya kini. Kalu dulu mabuk ubek batuk, kini ganti bebem. Untuk enjoy?? Iiiw, ngerinyo seh! Ooh, namo aslinyo samcodin, ubek batuk jugo. Samcodin oh Samcodin... Kalu aku batuk, minum perasan jeruk nipis campur kecap ajo,” kato Wak Utet sambil neruskan mbaco berita.
“Apoooo?!! Ganti namo untuk ngicu orang tuonyo? Anak macam apop ko kini? Suda la senang mabuk, sibuk enjoy, la senang ngicu pulo. Oii dunia, duniaaaa. Isinyo kok banyak tukang kicuuuu,” Wak Utet belanjut.
“Sabar, Wak. Sabaaar..” kecek Mang Bon.
“Sabar aponyo, Bon. Dak bisa dibiarkan yang cak iko. Merusak namonyo ko. Baco kan kau? Suda la beli ubek namo samcodin diganti tembem, untuk ngicu orang tuo. Minum ubek untuk mabuk, untuk enjoy. Rusak, rusaaaak!” kato Wak Utet.
“Itula, Wak. Kito bearok nian, piak-piak tekait ko bisa cari solusi secepeknyo. Kito sebagai orang tuo, kini jugo harus pacak jago anak-anak. Biar idak tegoda kek tembem ko tadi,” kato Mang Bon.
“Bebem, Bon. Bebeeeem.. Bukan tembem,” kecek Wak Utet sambil megang pipinyo.
“Tadi kato Wak tembem,” kato Mang Bon nyengir-nyengir.
“Salah tadi tu, maap seh,” kecek Wak Utet. 
“Enta la, Wak. Kadang la ceme ajo bawaan nengok dunia ko. Makin banyak aneh-anehnyo. Tapi cak mano lagi,” kato Mang Bon.
“Kadang, aku dewek meraso aku makin aneh,” kecek Wak Utet. (**)
  • Komentar via G+
  • Komentar via Facebook
Item Reviewed: Samcodin oh Samcodin Rating: 5 Reviewed By: Radar Pat Petulai