Tuesday, 14 February 2017

Lucunyo, Tukang Ngicu ko Kalu Ketauan Cak Idak Ajo

TEH KOCOK RPP

LA dikecek, kalu sala tu ngaku ajo, tanggung jawab. Dak usah pakai ngicu-ngicu, apolagi belari-lari dak jelas ke mano. Ujung-ujungnyo ditangkok jugo, dikurung jugo, masuk koran jugo, Padahal la betaun-taun kan kasus tu, raso-raso orang idak bakal ingek lagi. Nyatonyo? Iko pasti Mang Bon lagi baco berita Balek Dusun, Buronan Dicokok Buser, di koran RPP Pacak Nian! di warng teh kocok Wak Utet di belakang Bang Mego.
"Kan, Yat. Tengok ko, belari ke ujung dunio jugo, dapek tu la. La betaun-taun, sial pas balik dusun eh, kenai tangkok," kecek Mang Bon sambil sesekali nyeruput teh kocok.
"Iyo, yang merampok seles tu kan, Bon. Ditangkok pas lagi tidur pulo di ruma orang tuonyo. La baco aku beritanyo tadi. Kawan-kawan di pangkalan ojek, rami-rami beli RPP karno ndak nengok lanang tu," kato Mang Yat.
"Pantas cak iyo nian kau. Ruponyo la duluan tau," kecek Mang Bon. Mang Yat nyengir-nyengir.
"Itula, jadi manusio ko, kalu memang sala, ngaku ajo, tanggung jawab la, biar masala tu idak tambah banyak. Suda betanggung jawab, kan bisa idup tenang. Cubo cak lanang tu, biar belari jau, aku yakin idak kan tenang idupnyo. Raso-raso dikejar-kejar tu na. Idak nikmat la idup cak itu. Kalu dari dulu nyo nyerakan diri, mungkin hukumannyo kini la ndak selesai, Iyo, kan," Mang Bon belanjut.
"Iyo, betul kau tu. Samo cak ngicu. Kalu manusio la ngicu sekali, bekali-kali pasti ngicu terus, karno harus nutup kerjonyo ngicu ko tadi kan. Akhirnyo jadi tukang kicu. Idak sadar apo, yang namonyo kebenaran tu, cepek lambek pasti nampak tu la. Ndak betaun-taun ngicu, kelak ado masonyo ketauan. Kan lebi malu lagi kalu cak itu," kato Mang Yat.
"Cacaam.. La benar pulo tu, Yat. Sekali ngicu, manusio bakal ngicu terus," kecek Mang Bon.
"Tapi yang lucunyo, tukang ngicu ko kalu ketauan cak idak ajo. Mungkin la idak punyo malu lagi dak," kato Mang Bon.
"Raso malunyo la kala kek ngicu tu tadi. Ndak kau jadi tukang kicu dak punyo malu? Kalu aku idak eh. Biarla aku cak iko, yang penting idup jujur," kecek Mang Yat.
"Enak ajo, male jugo aku jadi tukang ngicu. Enak jadi tukang ojek ajo, atau tukang bakso, tukang es, dapek duit, halal, idak pakai ngicu," kato Mang Bon. (**)
  • Komentar via G+
  • Komentar via Facebook
Item Reviewed: Lucunyo, Tukang Ngicu ko Kalu Ketauan Cak Idak Ajo Rating: 5 Reviewed By: Radar Pat Petulai