Thursday, 23 February 2017

Jangan Suko Nggantung Masala, Emangnyo Jemuran

TEH KOCOK RPP
MANG Bon la tetunggu-tunggu nian, penasaran. Apola kiro-kiro hasilnyo kejadian "perang dingin" (ngerinyo, Mang?) soal listrik ko. Kalu dari inpormasi yang diberitakan koran RPP yang diikuti kek Mang Bon, tahapannyo la sampai ado pertemuan warga kek piak tekait, dipasilitasi wakil rakyat. Tapi sampai kini, belum jugo ado cak mano penyelesaiannyo. Sambil nunggu nasi uduk selesai dibikin Wak Utet, Mang Bon khusyuk mbaco koran RPP di warung teh kocok Wak Utet di belakang Bang Mego.
Dak lamo tu...
"Kiro-kiro apo la ujungnyo ko, Wak?" tanyo Mang Bon kek Wak Utet, sambil nunjukkan berita di koran RPP.
"Harusnyo idak pakai lamo-lamo penyelesaiannyo. Apolagi kan la dipanggil kek wakil rakyat, duduk samo-samo. Warga nyampaikan keluhannyo, piak tekait mbeberkan penjelasan. Ibarat kalu belago pas tanding sepak bola, la ditengahi kek wasit. Aku jugo dak tau ndak dibawak ke mano ujungnyo tu, Bon. Aku kurang ngerti aturan-aturan listrik. Yang aku tau, aku ndak taripnyo jangan mahal-mahal. Jangan sering mati lampu. Sederhana ajo," kecek Wak Utet sambil nyodorkan piring berisi nasi uduk pesanan Mang Bon.
Mang Bon ngangguk-ngangguk sambil narik piring nasi uduk tu. Laju makan pelan-pelan.
"Tapi, Bon, kalu kecek aku, jangan la lamo-lamo masala ko dibiarkan dak ado hasilnyo dak," kato Wak Utet.
"Iyo, Wak. Itu maksud aku. Karno kito ndak samo-samo enak. Kalu dak selesai-selesai tu, idak tenang dibueknyo," kecek Mang Bon.
"Nah itu la. Idup ko jangan suko nggantung masala, emangnyo jemuran. Masala tu cepek diselesaikan. Cubo la yo, kalu masala kecik dibiarkan, lamo-lamo jadi besak. Ado masala idak diselesaikan, lamo-lamo timbul masala baru, laju namba banyak la masala. Kelar idup lo, kalu kecek anak mudo kini, Bon," kato Wak Utet.
Mang Bon nyengir-nyengir.
"Wak ko pacak nian, cak koran RPP," kecek Mang Bon sambil ngasi jempolnyo. (**)
  • Komentar via G+
  • Komentar via Facebook
Item Reviewed: Jangan Suko Nggantung Masala, Emangnyo Jemuran Rating: 5 Reviewed By: Radar Pat Petulai