Friday, 10 February 2017

Biar Muko Sangar, Hati Putri Salju

TEH KOCOK RPP
CACAAM.. Alang ke ngeri kini. Mang Bon raso oleng pas baco berita Tempo Sehari Dua Warga Ditikam, di Koran RPP, di warung teh kocok Wak Utet di belakang Bang Mego tu. Raso idak teteguk teh kocok yang la diantar kek Wak Utet.
"Ai ngapo, seh? Apo teh kocok bikinan aku idak enak?" tanyo Wak Utet pas nengok muko Mang Bon.
"Bukan, Wak. Aku ni ngeri nian, baco berita ko. La baco kan, Wak, duo warga ditikam ko. Gara-gara nagi utang kek nonton pesta. Ado-ado ajo la. Pane nian cak nyo dunia ko kini," kato Mang Bon.
"Oh, iyo, la baco aku. Ngeri kini dak. Dikit-dikit nikam. Masi mending aku, cuman nokok kek sendok kayu," kecek Wak Utet sambil ngelap sendok kayunyo. Padahal Mang Bon raso-raso nengok Wak Utet lagi ngasa samurai, hihihi.
"Biar sendok kayu, sakit jugo tapi, Wak," Mang Bon protes, nah, Wak Utet tekikik-kikik.
"Sakit dikit, seh. Yang penting idak sampai bedara-dara, idak sampai nyabut nyawo, Bon. Asal kau tau, biar muko aku sangar, hati putri salju," kecek Wak Utet. Mang Bon tegelak-gelak kan lajunyo.
"Iyola kalu cak itu, Wak. Tapi kalu nurut Wak, ngapo orang kini ko muda nian ndak mbunuh orang yo?" tanyo Mang Bon.
"Kurang istigfar, kurang sabar, Bon. Makonyo, masala kecik laju ndak mbunu ajo. Mungkin jugo idak solat dak," jawab Wak Utet.
"Bisa jadi tu, Wak. Karno solat tu jugo melati kito sabar, kan ingek terus kek Tuhan. Makonyo ustad tu ngingekkan terus kito sebagai umat Islam jangan tinggal solat dak," kecek Mang Bon.
"Yang jelas, solat tu kewajiban kito kek Tuhan. Jadi kito solat karno menuhi kewajiban kito sebagai umat-Nyo. Bukan karno lain-lain. Apolagi karno mintak puji, aku tokok kuek-kuek nyo kek sendok kayu," kato Wak Utet. Mang Bon tekikik lagi.
"Ampun nian, Wak. Aku idak eh. Solat yo karno cak kecek Wak tadi, menuhi kewajiban kek Tuhan," kato Mang Bon. (**)
  • Komentar via G+
  • Komentar via Facebook
Item Reviewed: Biar Muko Sangar, Hati Putri Salju Rating: 5 Reviewed By: Radar Pat Petulai