Tuesday, 21 February 2017

Ati Kito Kuek Ndak Benar, Tapi Orang Idak Ndak

TEH KOCOK RPP
NAH, kau! Ke mano duit sebanyak itu nguap? Dimakan antu? Ditelan setan? Atau jangan-jangan... Ase lah, ke mano? ke mano? Mang Bon serius nian baco berita di koran RPP yang judulnyo MILIRAN RUPIAH MENGUAP.
"Cacaam.. Meleseeet kalu cak iko," kecek Mang Bon sambil nyeruput teh kocok kek makan pisang goreng di warung teh kocok Wak Utet di belakang Bang Mego.
Mang Yat yang lagi makan nasi uduk, laju dak sabar ndak baco koran RP jugo. Miliaran duit yang dibahas tu, we.
"La tau nguap ke mano, Bon?" tanyo Mang Yat.
"Iko aku la..." kecek Mang Bon dipotong pulo.
"Kelak, kelak ajo. Biar aku baco dewek. Seru cak nyo tu kalu duit miliaran dak tau ke mano. Duit sepulu ribu ilang ajo, bini aku mekik-mekik," kecek Mang Yat.
Pas la suda mbaco, Mang Bon langsung ngasi koran RPP kek Mang Yat. Kini giliran Mang Yat.
Dak lamo tu...
"Naaah, iko la yang dikecek Wak Utet, rugi mamang, dek," kato Mang Yat.
"Kalu penambangan dak sesuai aturan, balik-balik daera jadi korban. Enta ngapo sebelum disegel ko, masi bisa beroperasi, padahal idak ado ijin karno itu kawasan terlarang. Ayo la, ngapo bisa cak itu," kato Mang Bon.
"Tapi iko la disegel, Bon. Jadi dak bisa beoperasi lagi," kecek Mang Yat.
"Mintak-mintak la piak tekait konsisten. Jangan suda disegel seari duo ari, besok dibukak lagi. Bukak pasang bukak pasang, emangnyo apo. Intinyo harus ado tindakan tegas. Kalu la ado aturan mainnyo, yo patuhi. Kiro-kiro kurang pas, diuba. Jangan kebiasaan hobi langgar aturan," kato Mang Bon.
"Enta la, kini ko cak nyo banyak yang suko langgar aturan. Mungkin ndak buek sensasi," kecek Mang Yat, frustrasi nian kedengarannyo, hihihi..
"Kadang kito la ndak temunta pulo ngadok yang cak itu. Tapi apo la dayo orang bawa cak kito ko, Yat. Ati kito kuek ndak benar, tapi orang idak. Tuhan tu la eh, yang tau," laaah, Mang Bon ikut frustrasi jugo.
Mang Yat cuman ngangguk-ngangguk. (**)
  • Komentar via G+
  • Komentar via Facebook
Item Reviewed: Ati Kito Kuek Ndak Benar, Tapi Orang Idak Ndak Rating: 5 Reviewed By: Radar Pat Petulai