Tuesday, 11 October 2016

Idak Asal Gowes Ajo

Teh Kocok RPP
“CACAAM... Padek acara gowes ko,” kecek Mang Bon kek Mang Yat, sambil mbaco koran RPP.
Duo sekawan ko la datang dari pagi nian ke warung teh kocok Wak Utet di belakang Bang Mego tu, gara-gara kelaparan, hihihi..
“Berapo pesertanyo, Bon?” tanyo Mang Yat yang lagi makan tahu goreng sambil nyeruput teh kocok.
“Ampir limo ratus orang, Yat. Termasuk jumlahnyo ko la luar biaso nian. Ado pulo peserta yang la tuo, ikut gowes pulo. Aii, maso kito yang masi mudo kalah, dak,” kato Mang Bon.
“Hah? Tengok dulu. Umur berapo peserta yang tuo tu? Aku ajo besepeda sebentar la megap-megap cak ikan tepelanting dari akuarium,” kecek Mang Yat sambil ngambik koran RPP dari tangan Mang Bon.
“Oiii, kelak dulu aku belum selesai baco...” kato Mang Bon. Tapi dikasinyo jugo koran tu.
“Waiii, padek nian bapak ko. Apolagi keceknyo, besepeda Curup Bengkulu tu la biaso pulo. Kalu aku, mungkin la kejang-kejang Bon,” kecek Mang Yat. Mang Bon nyengir ajo dengar Mang Yat jujur nian.
“Haaaahh??!! Siapo yang kejang-kejang? Itu ayan apo kesurupan??!” Wak Utet datang-datang dari dapur, heboh.
“Yat ko nah, Wak,” jawab Mang Bon, tekikik-kikik.
“Haaaaah?!! Ngapo kau Yat?!!! Baru tau aku kau ado penyakit ayan,” Wak Utet tambah histeris.
“Sssst!! Basing ajo wak ko. Mano pulo aku ayan,” kecek Mang Yat sambil narok telunjuk di bibirnyo, nyuruh Wak Utet diam. Laju Wak Utet duduk dekek  tobo duo tu.
“Ah, Bon ko galak nian ngucak, seh,” kato Wak Utet.
“Jadi apo ceritonyo yang kejang-kejang tu? Ado pulo aku dengar megap-megap cak ikan tepelanting dari akuarium. Alangke ngerinyo pulo, seh,” kato Wak Utet. Mang Bon tegelak-gelak.
“Iko nah, Wak. Bahas acara besepeda kemaren tu. Ado bapak la tuo padek nian, ikut nyo. Kalu aku idaklah sanggup, itulah aku kecek pacak megap-megap cak ikan tepelanting dari akuarium. Laju bapak tu biaso besepeda Curup Bengkulu. Bayangkanlah, Wak, naik sepeda. Mano aku idak ndak kejang-kejang rasonyo,” kecek Mang Yat.
“Nah, padek nian kalu cak itu. Aku jugo lah, idak kan sanggup. Pacak kempes badan ko,” kato Wak Utet, tekikik pulo nyo.
“Kan besepeda tu jugo ndak dibiasokan, idak asal gowes ajo. Pisik kito jugo ndak dilatih. Jadi idak sembarangan. Idak sampai laju keram-keram pas besepada, napas idak ngap ngap. Karno la telatih,” kato Mang Bon.
“Iyo nian tu,” kato Wak Utet kek Mang Yat serempak. (**)
  • Komentar via G+
  • Komentar via Facebook
Item Reviewed: Idak Asal Gowes Ajo Rating: 5 Reviewed By: Radar Pat Petulai