Thursday, 13 October 2016

Enak Nian, seh, Dikit-dikit Khilaf

TEH KOCOK RPP
WAK Utet masih pagi buto la ngomel-ngomel. Apolagi Waaak... Ruponyo kesal kek kasus pencabulan tu nah. "Maso paman dewek cabul kek ponaan. Paman jenis apo iko, seh," kato Wak Utet dalam ati, tapi tetap emosi.
Dak lamo tu, Mang Bon sampai di warung Wak Utet di belakang Bang Mego tu. 
"Ngapo pagi-pagi la sangar ajo muko tu, Wak. Mano orang ndak beli," kucak Mang Bon.
"Diaaam!" segak Wak Utet sambil nodongkan sendok kayunyo, pas di depan idung Mang Bon. Apo dayo, Mang Bon langsung teduduk. Itula cari gara-gara.
"Baco ko nah. Paman cabul kek ponaannyo dewek. Ado paman cak itu? Ado ruponyo, Bon. Iko nah buktinyo. Kini ditangkok, masuk koran pulo," Wak Utet ngamuk-ngamuk, tapi langsung nyodorkan koran RPP kek Mang Bon.
"Cacaam.. Cubo aku baco dulu koran tu, Wak. Nah, Wak tolong bikin dulu pesanan aku, teh kocok plus pisang goreng yang manis cak senyum aku," kecek Mang Bon sambil nyengir.
"Issh, siput muji buntut," kato Wak Utet sambil lalu ke dapur, bikinkan pesanan Mang Bon.
"Ai gilo! Iko lah gilo nian namonyo ko," kato Mang Bon. Matonyo masih terus baco koran RPP. Lah, Mang Bon ngikut emosi pulo.
"Siapo yang gilo, Bon?" tanyo Wak Utet sambil bawakkan pesanan Mang Bon.
"Aku. Eh, orang ko nah. Yang kato Wak tadi paman cabul kek ponaan," jawab Mang Bon.
"Kau la baco sampai selesai kan beritanyo? Enak nian, seh, dikit-dikit khilaf. Laju bekhilaf galo manusio banyak ko kelak. Yang cabul, yang mbunuh, yang selingkuh, yang maling, yang korupsi. Ngaku khilaf galo," Wak Utet masih emosi. "Tapi kecek paman cabul ko, nyo nyesal, Wak," kecek Mang Bon.
"Ah, nyesal-nyesal, emangnyo ponaannyo bisa balik lagi cak semulo? Emangnyo ponaan tu idak trauma? Prai lah ngecek nyesal-nyesal, idak beguno kalu la tejadi. Praiii," kato Wak Utet. Mang Bon geleng palak ajo nengok Wak Utet ngomel-ngomel klop nian kek emosinyo, hihihi. (**)
  • Komentar via G+
  • Komentar via Facebook
Item Reviewed: Enak Nian, seh, Dikit-dikit Khilaf Rating: 5 Reviewed By: Radar Pat Petulai