Thursday, 22 September 2016

Tecido Jugo, Seratus Juta Ilang

Teh Kocok RPP
"ASTANAGANAGA!!" Wak Utet agak tepekik nian pas baco berita Kenalan di Facebook, Tertipu Rp 100 Juta, di koran RPP.
"Apo nian yang bikin tepekik tu, Wak? pinjamlah dulu koran tu," kecek Mang Bon yang masih makan lontong, la ampir pulo neguk sendok gara-gara tekejut dengar Wak Utet mekik.
"Makanlah dulu lontong tu. Kelak baru baco koran," kecek Wak Utet, tapi matonyo masih mantap nengok koran tu lah.
Mang Bon cak penasaran nian. Ngebut laju makan lontong tu.
"Nah, la udah, Wak. Siko koran tu, aku pinjam dulu. Kato Wak kan, bacolah koran biar idak ketinggalan informasi," kato Mang Bon.
"Ai, seh. Penasaran nian kau, Bon. Iko nah, tino ko, kenai kicu, seratus juta ilang. Seratus jutaaaa, Bon. Seratus jutaaa. Kalu duit aku, pacak mbesakkan warung ko, ganti meja kursi warung yang baru, gelas baru, piring baru, sendok baru, waiii.." kecek Wak Utet sambil geleng-geleng palak.
"CACAAAAM!!!" kini Mang Bon pulo tepekik. Wak Utet ampir jatuh dari kursinyo, tekejut, bro.
"Macam-macaaaam! Tekejut aku, seh!" kato Wak Utet. Mang Bon dak bereaksi. Ai, serius nian baco berita tu.
Dak lamo.. "Maaap, Wak. Maaaap nian. Aku tekejut nian kok bisa tino ko kenai kicu kek kenalannyo di fesbuk. Cacaam.. Iko gara-gara dijanjikan nikah kek duit ndak dibalikkan semiliar. Tecido jugo, seratus juta ilang," kato Mang Bon.
"Itulah, pesanlah kek segalo yang punyo pespa, apo pesbuk tu, jangan cayo nian kalu cuman kenal di dunia awer-awer tu. Dunia kelabu, idak jelas. Apolagi la sampai ngirim duit. Oiiii, prai lah pulo, seeeeh," kecek Wak Utet, nampaknyo masih sayang nian dengar seratus juta ilang tu, hihihi.
"Kini ko, Wak, yang kito kenal ajo masih galak ngicu. Apolagi yang cuman kenal di pespa, kecek Wak tadi tu," kato Mang Bon.
"Pesbuk, Bon," kecek Wak Utet. (**)
  • Komentar via G+
  • Komentar via Facebook
Item Reviewed: Tecido Jugo, Seratus Juta Ilang Rating: 5 Reviewed By: Radar Pat Petulai